މިނިސްޓްރީތަކާއި ބައްދަލުކުރުމުގެ ސިލްސިލާ ދަތުރުތަކެއްގައި ކާށިދޫ ކައުންސިލްގެ ފަރާތުން ހަ މިނިސްޓްރީއަކާއި ބައްދަލުކޮށްފިއެވެ. މިގޮތުން ބައްދަލުކޮށްފައިވަނީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރއާއި، މިނިސްޓްރީ އޮފް ހައުސިންގ، ލޭންޑް އެންޑް އާރބަން ޑިވެލޮޕްމަންޓާއި، އަދި މިނިސްޓްރީ އޮފް ހެލްތާއި އަދި މިނިސްޓްރީ އޮފް ސްޕޯޓްސް ފިޓްނެސް އެންޑް ރެކްރިއޭޝަނާއި އަދި މިނިސްޓްރީ އޮފް ދިވެހި ލެންގުއޭޖް ކަލްޗަރ އެންޑް ހެރިޓޭޖާއި އަދި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އާއެވެ.
ކައުންސިލްގެ ފަރާތުން މިނިސްޓްރީތަކާއި ބައްދަލުކޮށް، އެ މިނިސްޓްރީތަކާއި ގުޅޭގޮތުން ކާށިދޫގެ ތަރައްގީގެ އެކި ކަންކަމާއި ބެހޭ ގޮތުން މަޢުލޫމާތު ދިނުމާއި އަދި މަޝްވަރާތައް ކުރިއަށް ގެންދިޔައެވެ.
މިގޮތުން ދަނޑުވެރިކަމާއި ބެހޭ މިނިސްޓްރީއާއި ހިއްސާކުރި މައުލޫމާތުގެ ތެރޭގައި ކާށިދޫގެ ދަނޑުވެރިކަމުގެ ހާލަތާއި، ދަނޑުވެރިކަމުގެ މުހިންމުކަން ކާށިދޫގެ ރައްޔިތުންނަށް އޮތް މިންވަރާއި، އަދި ކާށިދޫގެ ދަނޑުވެރިކަމުގެ މުހިންމުކަން މުޅި ގައުމަށް އޮތް މިންވަރު މިނިސްޓްރީގެ ސަމާލުކަމަށް ގެނެސްފައިވެއެވެ. އަދި ދަނޑުވެރިކަމަށް ހުރި ގޮންޖެހުންތަކާއި މި ސިނާއަތު އިތުރަށް ތަރައްޤީ ކުރާނެ ގޮތްތަކާއި ގުޅޭގޮތުން މަޝްވަރާކުރެވުނެވެ.
ހައުސިންގ މިނިސްޓްރީއާއި އެކު ބޭއްވުނު ބައްދަލުވުމުގައި، ކާށިދޫގެ ލޭންޑް ޔޫޒް ޕްލޭން ރައްޔިތުންގެ ވޯޓުން ފާސްކުރުމަށްފަހު މިހާރު މިނިސްޓްރީގެ އެޕްރޫވަލްއަށް ފޮނުވާފައިވާކަން ކައުންސިލުން ފާހަގަކުރިއެވެ. އަދި ރަށުގެ ރައްޔިތުންނާއި އަދި ޚާއްސަކޮށް ޒުވާނުންގެ އުންމީދުތަށް ގުޅިފައިވަނީ ލޭންޑްޔޫޒް ޕްލޭނާއިކަން ފާހަގަކޮށް ވީހާވެސް އަވަހަކަށް ލޭންޑް ޔޫޒް ޕްލޭން ފާސްކޮށްދެއްވުމަށް އެދިފައިވެއެވެ.
މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އާއިއެކު ބޭއްވި ބައްދަލުވުމުގައި، މިހާރު ކާށިދޫއަށް އެންމެ ބޭނުން ޖެހިފައިވާ އިންފްރާސްޓްރަކްޗަރ ޕްރޮޖެކްޓްތަކާއި ބެހޭގޮތުން މަޝްވަރާކުރެވުނެވެ. އެގޮތުން މިހާރު ބަނދަރު އޮތް ދަތި ހާލަތުގެ މަޢުލޫމާތު މިނިސްޓަރއަށް ދެންނެވިއެވެ.
