ގޯލްޑަން ފުޓްސަލް ޗެލެންޖް 2025ގެ ރާއްޖޭގެ ޗެމްޕިއަންކަން ކާށިދޫއިން ހޯދައިފިއެވެ. ގޯލްޑަން ފުޓްސަލް އެސޯސިއޭޝަނުން ކޮންމެ އަހަރަކު ބާއްވާ ފުޓްސަލް މުބާރާތަކީ މުޅި ރާއްޖޭގައި ބޭއްވޭ އެންމެ ބޮޑު ފުޓްސަލް މުބާރާތެވެ. 2025 ވަނަ މުބާރާތުގައި ޖުމްލަ 128 ރަށަކުން ބައިވެރިވެފައިވެއެވެ. މި މުބާރާތުގެ އެޓޯލް ރައުންޑްގެ ގޮރޫޕް ސްޓޭޖްގެ އެއްވަނަ ޓީމްގެ ގޮތުގައި ކާށިދޫ އެޓޯލް ސެމީ ފައިނަލަށް ދަތުރު ކުރުމަށްފަހު، ސެމީ ފައިނަލުގައި ގާފަރުގެ މައްޗަށް 2-1 ގެ ނަތީޖާއަކުން ކުރި ހޯދިއެވެ. ގާފަރަކީ މުޅި ރާއްޖޭގައިވެސް ކާމިޔާބު މޮޅު ޓީމު ތަކުގެ ތެރޭގައި ހިމެނޭ ޓީމެކެވެ. އެއަށްފަހު އެޓޯލް ފައިނަލްގައި ކ.މާފުށި އަތުން ބަލިވީއެވެ. ނަމަވެސް އެޓޯލް ރައުންޑްގެ ރަނަރަޕް ޓީމުގެ ގޮތުގައި ޒޯން ބުރަށް ގޮސް މާފުށި 3-1އިން ބަލިކުރިއެވެ. އަދި ޒޯން 3 ގެ މެޒުތަކަށްފަހު ޒޯން ފައިނަލްގައި ބ.އޭދަފުށި އަތުން ބަލިވިނަމަވެސް ޒޯން 3 ގެ ރަނަރަޕް ޓީމުގެ ގޮތުގައި ނޭޝަނަލް ރައުންޑް އޮފް 16 އަށް ދަތުރުކުރިއެވެ. އަދިއެއަށްފަހު ރައުންޑް އޮފް 16ގައި ތ.ތިމަރަފުށި ބަލިކޮށް، އަދި ކުއާޓަރ ފައިނަލްގައި ވިލިމާލެ، ސެމީ ފައިނަލްގައި ގދ.ވާދޫ ބަލިކޮށް މުބާރާތުގެ ގްރޭންޑް ފައިނަލަށް ދަތުރުކުރިއެވެ. އަދި ފައިނަލްގައި ހދ.ނައިވާދޫގެ މައްޗަށް 4-1ގެ ބޮޑު ތަފާތަކުން ކުރިހޯދާ ފުޓްސަލް ޓޯނަމަންޓްގެ ޗެމްޕިއަންކަން ހޯދީއެވެ. ފައިނަލް މެޗުގެ މޭން އޮފް ދަ މެޗަކީ ކާށިދޫ ޓީމްގެ ޢަބްދުﷲ ސުޒެއިރެވެ. އަދި މުބާރާތުގެ ފެއަރ ޕްލޭ ޓީމަކަށް ހޮވިފައިވަނީވެސް ކާށިދޫގެ ޓީމެވެ.
މުބާރާތުގެ ކިންގް އޮފް ޓޯނަމަންޓަކަށް ހޮވިފައިވަނީ ކާށިދޫ ޓީމްގެ ގޯލް ކީޕަރު މުޙައްމަދު ސަލީލެވެ. މިއީ ގޯލް ކީޕަރެއް މި މުބާރާތުގެ ތާރީޚްގައިވެސް މުބާރާތުގެ އެންމެ މޮޅު ކުޅުންތެރިއަކަށް ހޮވުނު ފުރަތަމަ ފަހަރެވެ. މުބާރާތުގެ އުންމީދީ ކުޅުންތެރިއަކީ ކާށިދު ޓީމްގެ އިސްމާއިލް ރަޔާނެވެ. މުބާރާތުގެ އެންމެ މޮޅު 6 ކުޅުންތެރިންގެ ތެރޭގައި ޢަބްދުﷲ ސުޒެއިރާއި، އަޖުލާން ޢަބްދުލްހައްނާނާއި، އަދި މުޙައްމަދު ސަލީލް ހިމެނިފައިވެއެވެ. އަދި މުބާރާތުގެ އެންމެ މޮޅު ކޯޗަކީ ކާށިދޫ ޓީމްގެ ކޯޗް އަލީ ހައިޝަމް (ޗުމްޕު) އެވެ.
2025 ވަނަ އަހަރުގެ މި މުބާރާތުގައި ކާށިދޫގެ ފުޓްސަލް ޓީމް ބައިވެރި ކޮށްފައިވަނީ ކާށިދޫ ކައުންސިލްގެ ފަރާތުންނެވެ. އަދި މުޅި މުބާރާތަށް ޓީމުގެ އެކި ކަންކަމަށް ކައުންސިލްގެފަރާތުން ބޮޑު ހޭދައެއް ކޮށްފައިވެއެވެ. އަދި މާލެއަތޮޅު އަތޮޅު ކައުންސިލްގެ ފަރާތުން ފައިސާގެ ބޮޑު އެހީތެރިކަމެއް ކާށިދޫ ޓީމަށް ދީފައިވެއެވެ.
ގޯލްޑަން ފުޓްސަލް ޗެލެންޖްގެ ރަންތަށި ހިފައިގެން ޓީމް ރަށަށް އައުމުން ރަށުގެ ރައްޔިތުން ވަނީ ޓީމަށް ވަރަށްހޫނު މަރުހަބާއެއް ކިޔާފައެވެ.
ޓީމަށް ސާބަސް ދިނުމާއި މަރުހަބާ ކިޔުމުގެ ޝުއޫރު ފާޅުކުރުމުގެ ގޮތުން ކައުންސިލާއި މުއައްސަސާތަކުން ބޭއްވި ޑިނަރނައިޓްގައި ވާހަކަދައްކަވަމުން ކާށިދޫ ކައުންސިލްގެ ރައީސް ވިދާޅުވީ، ޓީމުން ރަންތައްޓާ ހަމައަށް ކުރި މިދަތުރަކީ އެންމެ އަހަރެއްގެ މަސައްކަތެއް ނޫންކަމަށާއި، މިއީ ފާއިތުވި އަހަރުތަކުގައި މިކަމުގައި ޝާމިލުވާ އެންމެން ގަވާއިދުން ކުރި މަސައްކަތްތަކެއްގެ ނަތީޖާ ކަމަށެވެ. އޭގެ ތެރޭގައި ހުނަރު ތަރައްގީކުރުމަށް ކުޅުންތެރިން ކުރި މަސައްކަތްތަކާއި، ކައުންސިލުން ކޮންމެއަހަރަކު މުބާރާތްތައް ބާއްވަމުން، އެ މުބާރާތްތަކުގެ ފެންވަރު އަހަރުން އަހަރަށް ދިޔައީ ރަނގަޅު ކުރަމުން ކަމަށާޢި، ކުޅުންތެރިންނާއި މެނޭޖްމަންޓްވެސް ދިޔައީ ކޮންމެ ފަހަރަކުވެސް ކުރީ ފަހަރަށްވުރެ މިކަމަށް ފަރިތަވަމުންކަމަށެވެ. އަދި ކާމިޔާބު ތަކުރާރުކުރަން ބޭނުންނަމަ އެކުވެރިކޮށް ތިބުމަށް ކުޅުންތެރިންނަށް ގޮވާލެއްވިއެވެ.
