ކާށިދޫ ކައުންސިލް ފުޓްބޯލް ޗެލެންޖް 2023 ބާއްވައިފިއެވެ. މި މުބާރާތް ބާއްވާފައިވަނީ 21 އެޕްރީލް 2023 އިން 29 އެޕްރީލް 2023 އަށެވެ. މި މުބާރާތުގައި ޖުމްލަ 10 ޓީމު ބައިވެރިވެފައިވެއެވެ. ކާށިދޫ ކައުންސިލްގެ މި މުބާރާތް އިންތިޒާމް ކުރުމުގެ އެންމެހާ ކަންކަން ކޮށްފައިވަނީ އެމްޖީ ސްޕޯޓްސް ކުލަބުގެ ފަރާތުންނެވެ. މި މުބާރާތަކީ ކާށިދޫގެ ޒުވާނުންގެ މެދުގައި ފުޓްބޯޅައިގެ ރޫހު އާލާކޮށް، ރަށުގެ ކުޅިވަރު ތަރައްގީކޮށް، ކާށީދޫއަކީ އަތޮޅު ފެންވަރުގައާއި ޤައުމީ ފެންވަރުގައި ނަންހިނގާ ރަށަކަށް ހެދުމުގެ މަޤްސަދުގައި ކައުންސިލުން ބާއްވާ މުބާރާތެކެވެ. މިގޮތުން މިދިޔަ އަހަރު ވެސް ކާށިދޫ ކައުންސިލް ފުޓްބޯލް ޗެލެންޖް 2022 ގެ ނަމުގައި މުބާރާތް ބާއްވާފައި ވެއެވެ. ކޮންމެ އަހަރަކު މިގޮތަށް މުބާރާތް ބާއްވަން ފަށާފައިވަނީ 2022 ވަނަ އަހަރުން ފެށިގެންނެވެ.
ކާށިދޫ ކައުންސިލް 2023 ގެ ޗެމްފިއަން ޓީމަކީ ކްލަބް ފްލަޔާސް އެވެ. އަދި ރަނަރަޕް ޓީމަކީ ކްލަބް ޑިވެންޖް އެވެ. މި މުބާރާތުގެ އެންމެ މޮޅު ކުޅުންތެރިއަކަށް ހޮވިފައިވަނީ ކްލަބް ފްލަޔާސްގެ އަޙްމަދު ރާޒީއެވެ. އެންމެ މޮޅު ފޯވާޑު ކުޅުންތެރިޔަކީ ޓީމް “ކޮން” ގެ އިސްމާއިލް ރަޔާން އެވެ. އެންމެ މޮޅު މިޑްފީލްޑް ކުޅުންތެރިޔަކީ ސްޕާޓަންސްގެ އަޙްމަދު ޝަމާލްއެވެ. އެންމެ މޮޅު ޑިފެންޑަރަކީ ކްލަބް ޑިވެންޖްގެ މުޙައްމަދު މުސްޠަފާއެވެ. އެންމެ މޮޅު ގޯލް ކީޕަރަކީ ކްލަބް ޑިވެންޖްގެ މުޙައްމަދު ޝަމާނެވެ. އަދި ފެއަރ ޕްލޭ ކުޅުންތެރިއަށް ހޮވިފައިވަނީ “އީއެން”ގެ އަޙްމަދު ނިޝާހްއެވެ.
